Spider-Man: Into the Spider-Verse

මෙම චිත්‍රපටය Sony Pictures Animation සමාගම මගින් නිෂ්පාදනය කරන ලද Spider-Man: Into the Spider-Verse (2018) වන අතර, සිරස TV නාලිකාව මගින් සිංහලට හඬකවා විකාශය කරන ලද මෙහි හඬකැවීම් අධීක්ෂණය රෝචන විමලදේව විසින්ද, පරිවර්තනය, දෙබස් සහ හඬකැවීම් අධ්‍යක්ෂණය කාංචන අමරරත්න විසින්ද සිදුකර ඇත. Miles Morales සඳහා අශාන් චන්ද්‍රසේන, Peter Parker සඳහා අතුල ජයසිංහ, Gwen Stacy සඳහා පහනි වික්‍රමාරච්චි, Jeff Davis සඳහා සසිත සේනානායක, Rio Morales සඳහා ස්නේහා වසුන්දරා, Aunt May සඳහා ශ්‍යාමලී ලිවේරා, සහ Kingpin සඳහා ලහිරු වෙවිපුල් ආරච්චි ඇතුළු දක්ෂ හඬකැවීම් ශිල්පීන් රැසක් හඬින් දායක වී ඇත. විකිරණශීලී මකුළුවෙකු දෂ්ට කිරීමෙන් පසු අලුතින් Spider-Man බවට පත්වන යොවුන් වියේ පසුවන Miles හට, Kingpin විසින් විවෘත කරන ලද සමාන්තර විශ්වයන් හරහා පැමිණි වෙනත් විශ්වයන්හි Spider-වීරයන් කිහිපදෙනෙකු මුණගැසෙන අතර, ඔවුන්ව නැවත තම ලෝකයන් වෙත යවමින් සමස්ත විශ්වයන්ම විනාශයෙන් බේරාගැනීමට නව Spider-Man ලෙස තම සැබෑ වගකීම හා ආත්මවිශ්වාසය ගොඩනඟා ගැනීමට සිදුවේ. තමාගේ සුවිශේෂීත්වය සහ අනන්‍යතාවය හඳුනාගැනීම, බිය ජයගනිමින් ඉදිරියට තබන විශ්වාසයේ පියවර (Leap of Faith) සහ ඕනෑම කෙනෙකුට වෙස්මුහුණ පිටුපස සිටින සැබෑ වීරයෙකු විය හැකි බව මෙහි ප්‍රධාන තේමාව වෙයි.